રસજ્યોત

એક જ્વાલા જલે તુજ નેનનમાં,

………….. રસજ્યોત નિહાળી નમું, હું નમું;
એક વીજ ઝલે નભમંડળમાં,
………….. રસજ્યોત નિહાળી નમું, હું નમું.

મધરાતના પહોર અઘોર હતા,
………….. અન્ધકારના દોર જ ઓર હતા;
તુજ નેનમાં મોરચકોર હતા,
………….. રસજ્યોત નિહાળી નમું, હું નમું.

અહા ! વિશ્વનાં દ્વાર ખુલ્યાં-ઉછળ્યાં,
………….. અહા ! અબધૂતને બ્રહ્મયોગ મળ્યા;
અહા ! લોચન લોચન માંહી ઢળ્યાં,
………….. રસજ્યોત નિહાળી નમું, હું નમું.

દગ્બાણથી પ્રારબ્ધલેખ લખ્યા,
………….. કંઈ પ્રેમીએ પ્રેમપથી પરખ્યા;
અને આત્માએ આત્મનને ઓળખ્યો,
………….. રસજ્યોત નિહાળી નમું, હું નમું.

– ન્હાનાલાલ